අන්තෝජටා බහිජටා

 මේ ප්‍රශ්න කිරීම වගේම තොරතුරු සඳහන් කිරීම කිසිවෙකු හෝ කිසිදු වෘත්තියක් අපහසුතාවට පත් කිරීමට නොවේ. අදාළ විශේෂඥයින්ගේ උපදෙස් සඳහාය.

භෞත චිකිත්සාව...

මගේ ගෙල පෙදෙසේ අසනීපයකට භෞත චිකිත්සාව නොහොත් තේරෙන සිංලෙන් කිව්වොත් ෆිසියෝතෙරපි (Physiotherapy )

නිර්දේශ කළා. විවිධ තැන් වල විවිධ මිල. ඒක නොවෙයි ප්‍රශ්නය. එක් එක් තෙරපිස්ට් ගේ තෙරපි රටාව වෙනස් වීම. හා ඒක කමක් නෑ කියමුකො. ඒත් එකෙක්කෙනා දෙන ව්‍යායාම වෙනස් විතරක් නොවේ එක්කෙනෙක් නිර්දේශ කළ ව්‍යායාම දැන්ම කරන්නෙපා කියලත් කියනවා. මේ හැමෝම KDU හෝ පේරා ග්‍රැජුවේට්ලා. පස් දෙනෙක් භෞත චිකිත්සා කළා. පස් ආකාරයක්.

මොන භූත චිකිත්සාවක්ද මංදා..

"මං මස්ල් රිලැක්ස් කළාම ආයෙ ස්ටිෆ් වෙලානෙ.." හොඳටම කරන තෙරපිස්ට් නෝනා කිව්වා.

"ඉතිං මං මොකද කරන්නෙ..එක එක දවසට එක එක්කෙනානෙ ඉන්නෙ.."

===============

වෛද්‍ය ප්‍රතිකාර...

ඕක මොකක්ද...දොස්තරලත් එකම ලෙඩේට විවිධ ප්‍රතිකාරනෙ කරන්නෙ. සමහරු කලින් දොස්තර දුන්නු බේත් විසිකරල දාන්න කියනවත් එක්ක.

මේ අසනීපෙදිත් එහෙමයි. එක දොස්තර කෙනෙක් ගත්තු එක්ස් රේ බලලා ඔය පැත්තෙන් අරං බෑ..මේ පැත්තෙන් අරගෙන එන්න කියලා අනෙක් දොස්තර කියපි. දුන්නු බේත් වෙනස් කරපි.

මේ අසනීපෙ විතරක් නොවෙයි. ගොඩක් වෙලාවට වෛද්‍යවරුන් දෙන්නෙක් ළඟට ගියොත් දෙවිදිහක්. තුන් දෙනෙක් ළඟට ගියොත් තුන් විදිහක්.

=======================

ෆිසියෝතෙරපිස්ට්ලා, දොස්තරලා අහිතක් හිතන්න කාරි නෑ...ඇයි ඒ මදිවට ඉංජිනේරුවෝ ...

ඉංජිනේරු උපදෙස් ...

හිතවතෙක් ගෙයක් හදන්න ප්ලෑන් ඇඳලා, ආකිටෙක්ට් සැලසුම් සකස් කරලා ඩිසයින් එක ස්ට්‍රක්චරල් ඉංජිනේරුවෙකු ලවා කරවා ගත්තා.

වැඩබිම බාර ගත්තු සිවිල් ඉංජිනේරුවා කිව්වා යෝජිත කම්බි ලොකු වැඩියි. 16 ට 12 දාන්න පුළුවන් ...10 ට 8 දාන්න පුළුවන් කියලා. ඊට පස්සෙ ඒ බව මට කිව්වා. මං නමට ඉංජිනේරුවට ඕවා තේරෙන එකක් යැ. සැක හැර දැනගන්න පේරා Structural ඉංජෙකුට පෙන්නුවා.

"වැඩියි තමයි මචං. ගොඩක් නොවේ ටිකක්.

ඉන් ඩීටේල් කැල්ක්‍යුලේට් කළොත් 16 කීපයක් 12 කළෑකි. හැබැයි සේවිං එක 10% විතර.

ඕක ඔහොමම කරහං" කිව්වා.

10% සේවිං එකත් ලක්ෂ 5 ක් විතර.

කෝකටත් කියලා අමාත්‍යංශයක ඔවැනි ගණනය කිරීම් චෙක් කරන ජූනියර් පේරා ඉංජෙකුට පෙන්නුවා. පෙන්නුවාමත් නොවේ...කතාවට ගිහිං මේ අලකලංචිය කිව්වම බලෙන් ඉල්ලන් බැලුවා.

"හපොයි...මේ කම්බි සයිස් මදි. ෆුටින් එකත් මදි" කිව්වා. මයි ෆුට්...

-සිතන්නා...

නික්ම ගිය මහාචාර් ය චන්ද්‍රසිරි පල්ලියගුරු

 

ලංකාවේ මෙතෙක් පළවූ සිනමාව ගැන සාරගර්භ හා දුර්ලභ දැනුමක් ගෙනා චිත්‍රපට සඟරාව වන්නේ ඈෂ්ලි රත්නවිභූෂණ ගේ ආසියානු සිනමා කේන්ද්‍ද්‍ර මගින්, ඔහුගේම සංස්කාරකත්වයෙන් යුතුව පළ වූ "සිනෙසිත්" සඟරාවයි. 1985 වසරේ නිකුත් වූ "සිනෙසිත්" සඟරාවේ පළමු කලාපයට එවකට කැලණිය විශ්වවිද්‍යාලයේ ආචාර්ය චන්ද්‍ද්‍රරි පල්ලියගුරු ලියූ "දේශපාලන සිනමාවේ මූලිකාංග" නමින් වූ ලිපිය මගේ නෙත ගැටුණේ ඉන් වසර කීපයකට පසුව "සිනෙසිත්" සඟරා සියලු කලාප සන්තක කොට ගනිද්දීය.

ඉනුත් වසර 12 කට පසු මගේ පශ්චාත් උපාධි නිබන්ධය සඳහා "ලාංකික සිනමාවේ දේශපාලන ප්‍රවණතා" මැයෙන් අයන කටයුතු කරන්නට පෙළඹුණේ ඉහත කී ලිපියයි.

එවිට මගේ උපදේශකයා වූයේද ආචාර්ය චද්‍ර‍රසිරි පල්ලියගුරුමය. ලාංකික සිනමාවේ බිහිවූ දේශපාලන චිත්‍රපට පිළිබඳ අධ්‍යයනයේදී එතෙක් චන්ද්‍ද්‍රරි පල්ලියගුරු, ගාමිනී වේරගම වැන්නන් ගෙන ආ ප්‍රවාදය හරස් විය. ගාමිණී ෆොන්සේකා කිසිසේත්ම දේශපාලන සිනමාකරුවෙකු නොවන බව මා තර්කානුකූලව ගෙන හැර පෑවද පල්ලියගුරු ආචාර්යතුමා ඊට එකඟ නොවීය.

අවසානයේ ගුරු ගෞරවය රඳවා ගෙන මගේ පශ්චාත් උපාධි අධ්‍යයනය අතැර දැමුවෙමි.

ඉනුත් වසර 5 ට පසුව එකී අධ්‍යයනය නැවත ආරම්භ කළේ ආචාර්ය ආරියරත්න ඇතුගල යටතේය. එකී අධ්‍යයනය සම්පූර්ණ කිරීමේදී ලාංකික සිනමාවේ සිටි එකම දේශපාලන සිනමාකරුවා ධර්මසේන පතිරාජ බව මගේ තීන්දුව විය. "ලාංකික සිනමාවේ පතිරාජ ලකුණ" නමින් කෘතියක් පළ කළේ මේ නිබන්ධය ඇසුරිණි.

තමන්ගේ මතයට එරෙහි වූ ශිෂ්‍යයා ගැන මහාචාර්ය පල්ලියගුරු උරණ වූයේ නැත. ඉන් පසු හමු වූ බොහෝ අවස්ථාවල හිස මඳක් ඇල කොට දුක සැප විමසන්නට අමතක කළේ නැත. එතුමන් මෙරට බුද්ධිමතුන් විශාල පිරිසකට නිසි මඟ හෙළිපෙහෙළි කළ දක්ෂ ගුරුවරයෙකි. චන්ද්‍රසිරි පල්ලියගුරු යනු නිහතමානී බවේ සංකේතයකි.

දැවැන්ත ගල් කුළුණු එකින් එක ඇද වැටෙන්නට පටන් ගෙන තිබේ. මහාචාර්ය චන්ද්‍රසිරි පල්ලියගුරුගේ අභාවය ඊට සාක්ෂි දරයි.

-සිතන්නා...

මැලේසියාවේ යාඤා ගෘහයක මුත්‍රා කිරීම

මගේ YouTube චැනලය වන කතා කෝච්චියෙන් මෙවර ඉදිරිපත් කරන්නේ වෙනස් ආකාරයක කතා දෙකක්.

පළමු කතාවට පාදක වන්නේ "නොනිමි ගමන {Endless Journey}" කෙටි චිත්‍රපටය ඇමෙරිකාවේ ‌ලොස් ඇන්ජලීස් හි තිරගත වූ අවස්ථාවේ නැවතී සිටි Sheraton හෝටලයේ දී දුම් පානය කොට දඩයකට ලක් වීම

ඒ අකරතැබ්බයක් අවසානයේ කොළඹ අලුත්කඩේ උසාවියේ නඩුවක් සඳහා පෙනී සිටින්නට ගිය විට අලුත් කඩේ උසාවි බිමේ වවුල් වසුරු තලියක් මත ඇද වැටීම

ඒ අකරතැබ්බෙන් පසු පිටකොටුවේ බෝ ගහ අසල උඩුකය නිරුවතින් ඇඳුම් මාරු කිරීම

දෙවැනි කතාවෙන්

මැලේසියාවේ යාඤා ගෘහයක මුත්‍රා කිරීමේ අති බිහිසුණු අවස්ථාව විස්තර කෙරෙනවා.

-සිතන්නා...

225 පමණක් නොව රටේ වැඩි දෙනා හොරු

 

හොරු ගැන හොරෙකුගෙන් .....

ගී පදමාලා, සාහිත්‍ය කෘති හොරු ගැන ෆේස්බුක් පෝස්ට් දෙකක් දැම්මම නොහිතපු හොරු එළියට ආවා. ඒ වගේම සමහරු හොරකම වහන්න උත්සහ කළා. නිකං වෙන්න බෑ ..ඔය කිව්වට ෂුවර් නෑ වගේ අදහස් තිබුණා.

මේ ලියන්නෙ ඒ ගැන නොවෙයි. ඒ එක්කම හිතේ මතු වුණු කාලාන්තරයක් තිස්සේ තියෙන අදහසක්.

ඉහත සඳහන් නිර්මාණ හොරු ඉන්නවා. ඒ වගේම ශිෂ්‍යයින්ගේ පර්යේෂණ මංකොල්ල කාලා තම නම යොදා ප්‍රකාශන එළිදක්වන ආචාර්ය මහාචාර්යවරුන් ඉන්නවා.

ඊටත් එහා කියන්නෙ මා ඇතුළු සමස්ථ සමාජයේ වැඩිදෙනා කිසියම් හොරකමක්, හොර වැඩක් කරලා තියෙනවා. එහෙම නොවෙන කෙනෙක් ඉන්නව නං කලාතුරකින්.

මං ප්‍රසිද්ධ හොරෙක්.

පොත් හොරකම් කරලා තියෙනවා.

බස්, කෝච්චි වල හොරෙන් ගිහිං තියෙනවා. චාන්ස් එකක් ආවොත් තවමත් යනවා.

මාර්ග නීති කඩලා පොලිස්කාරයින්ට පගාව දීලා හොරකමට උදව් කරනවා.

පුතාව තර්ස්ටන් එකට දාන්න හොර ඇඩ්‍රස් හැදුවා. ඉස්කෝලෙට පගාව දුන්නා.

පස්සෙ කාලෙක මං ඡන්ද නාම ලේඛනයේ ලියාපදිංචි වෙලා නොතිබුණ නිසා පුතාට පුරවැසි හැඳුනුම්පත ගන්න ග්‍රාමසේවකට පගාව දීලා ඒක කර ගත්තා.

මෙතන ලියන්න බැරි හොර උප්පැන්න සහතික හැදීම, පෞද්ගලික වාසියක් සඳහා මගේ පෞද්ගලික තොරතුරු රැගත් කාර්යාල ලිපි ගොනුවක් හොරකම් කිරීම් වගේ හොරකම් කරලා තියෙනවා.

ඇයි හොර අත්සන්. ඉස්කෝලෙ යද්දි තාත්තගෙ අත්සනෙන් පටන් අරං විවිධ අත්සන්. මං පට්ට හොරෙක් කියන්න ඔය මදෑ..

ගොඩක් අය දරුව පාසලට දාන්න හොර වැඩ කරනවා.

ආණ්ඩුවේ කන්තෝරුවල පහළම පියන්ගේ ඉඳන් හොරකම් කරනවා.

ෆයිල් එකක් යට ගහන්න, යට තියෙන එකක් උඩට ගන්න සල්ලි ගන්නවා.

ලිපිකරුවා ඉක්මනින් වැඩක් කරන්න සල්ලි ගන්නවා.

ආර්.එම්.වී, අයිඩෙන්ටිටි කාඩ්, පාස්පෝට් කාර්යාල වගේ තැන්වල

ප්‍්‍රසිද්ධියේ හොරකම් කරනවා. මේ ළඟදි ඕස්ට්‍රේලියාවේ ඉඳං ආව මගෙ මිතුරෙක් මගේ උපදෙස් මත පෝලිමේ ගිහිං පාස්පෝට් කීපයක් අලුත් කරගන්න යද්දි නිලධාරියා ළඟට ඇවිත් කිව්වේ රු. 4000/- දෙන්න. දවල් 2 වෙද්දි වැඩේ කරල දෙන්නම් කියලා. රෑ 9 ට දෙනව කිව්ව පාස්පෝට් දවල් 2 ට ගත්තා.

එතනින් එහාට කොන්ත්‍ත්‍රාත්කාරයා හොරකම් කරනවා. කරපු වැඩවලට චෙක් එක ගන්න නිලධාරීන්ට සල්ලි දෙන්න ඕනෑ. ඩ්‍රැයිවර්ලා තෙල් අදිනවා. හොර රනින් චාට් ලියනවා.

ඇයි ඇඟිලි සලකුණු යන්ත්‍්‍රයක් නැත්තං පැමිණීමේ රෙජිස්ටරයේ බොරු වෙලාව දාලා අත්සන් කරනවා.

බස් කොන්දොස්තරලා මාටියා ගහනවා.

රස්සාව ගන්න දොළපිදේණි දෙනවා. උසස්වීම් ගන්න ඇඟ දෙනවා. ටෙලිනාට්‍ය පෙන්නගන්න අනුමත කරන්නාට ලොකු ගාණක් දෙන්නෝනෑ. හැම රූපවාහිනී චැනල් එකකම. පත්තරේ කවියක්, ලිපියක් දාගන්න දොළපිදේණි දෙන අවස්ථා තියෙනවා.

වාසි ලබාගන්න කිරිමුට්ටි ලොක්කගේ ගෙදරට අදිනවා.

ගීත, චිත්‍රපට හොරකම් කරනවා. ඔරිජිනල් එක නැතිව පයිරේට් කොපි විකුණනවා. ප්‍රකාශකයින් කර්තෘට හොරෙන් නැවත මුද්‍රණ ගහනවා. පොත් කඩකාරයෝ පොත් විකුණලා සල්ලි නොදී හොරකම් කරනවා. ඒවා මටත් වෙලා තියෙනවා. කර්තෘට කර්තෘභාගය දෙන්න ඕනෙ

ප්‍රකාශකයෝ කර්තෘගෙන් සල්ලි අරං පොත් ගහනවා.

හොර වෙද්දු ඉන්නවා. හොර බේත් දෙනවා. බේත් වලින් හොරකම් කරනවා.

පාරක තොටක යන්න බෑ මාළ කඩනවා.

පාරෙ නවත්තලා ගිය වාහන ඇරලා සුද්ධ කරනවා. වාහනත් හොරකම් කරනවා.

විභාග ප්‍රශ්න පත්‍ර හොරකම් කරලා විකුණනවා. හොරට වෙන කෙනෙක් දාලා විභාග ලියනවා. අඩුම තරමෙ හොරාට කොපි කරනවා.

කඩෙන් ඇඳුම් හොරකම් කරනවා. කඩෙන් බඩු උස්සනවා.

මේ අල්පයයි. ඒකයි කිව්වෙ සමස්ථ සමාජයෙන් වැඩිදෙනා හොරු. ජීවිත කාලයේ කිසිදු හොරවැඩක් නොකරපු කෙනෙක් හොයන එක නොමළ ගෙයකින් අබ ඇටයක් හොයනවා වගේ.

හොරට ඡන්දෙ දානවා. ඡන්දෙන් හොරු පත්කරගන්නවා. ඡන්ද නාම යෝජනාත් හොරට ටිපෙක්ස් කරනවා.

ඊට පස්සෙ 225 ම හොරු කියනවා. හොරු එළවමු කියනවා. එළෙව්වත් පත්කරගන්න වෙන්නෙත් හොරුම තමයි. සමාජයේ ඉන්න දෙකෝටියක්ම හොරු. ඒ හොරුන්ගෙ නියෝජිතයොත් හොරු.

-සිතන්නා...

පයිරේට් ද? ඔරිජිනල් ද?

 

"බඹරු ඇවිත්" අලුත් ප්‍රින්ට් එක යූටියුබ් දාලා කියලා අපේ මිත්‍රයින් කම්පාවෙනවා දැක්කම මෙහෙම ලියන්න හිතුණා.

===================

අපි විදෙස් ෆිල්ම් බලන්නෙම පයිරේට් කොපි නේද ?.

හැබැයි යූටියුබ් නං බලන්නෑ. YTS(yifi), Piratebay වගේ වගේ සයිට් වලින් බාගත කරගෙන බලන්නේ.

ඒ හංදා මේක අපේ සිංහල සිනමාව ගැන අතිශය සංවේදී මාතෘකාවක් වුණාට පොදුවේ ගත්තම කොහොමත් සිද්ධ වෙන දෙයක්.

මීට විරුද්ධව අදහස් තියෙන බව දැන දැනම මේ ලියන්නේ පවතින යථාර්ථය ගැනයි.

ගොඩක් සද්දෙ දාන අයත් බලන්නෙ පයිරේට් කොපි. එහෙම නොවෙන්න අපට විදෙස් ෆිල්ම් බලන්න වෙන්නෙම නෑ.

ඔරිජිනල් බලන්න හිටියොත් අපට විදෙස් චිත්‍රපට කීයෙන් කීයක්ද බලන්න ලැබෙන්නේ....?

පයිරේට් ද? ඔරිජිනල් ද?

-සිතන්නා...

සෞඛ්‍ය සේවයේ ජරාජීර් ණ වෘත්තීය සමිති

 

පහුගිය කාලේ කළ කී දේ නිසා රුක්ෂාන් බෙල්ලන වෛද්‍යවරයාට මං කොහෙත්ම කැමති නෑ. ඔහුගෙ දේශපාලන අරමුණු වලටත් එකඟ නෑ..

එත් සෞඛ්‍ය සුළු සේවකයන්ගේ අධානාග්‍රාහී වැඩවැරුම් හා පාරම්බෑම් ඉදිරියේ ඔහුගෙ පෙනී සිටීම අගයනවා.

ඔය ඇටෙන්ඩන්ට්ලා, පිරිසිදු කරන්නන් හා කම්කරුවන් රොහල්වල මාෆියාවක් ගෙනියනවා. එකාට එකා සම්බන්ධව ලෙඩ්ඩු සූරාකනවා. ඇඳක් ගන්න, බෙඩ්ෂීට් දාගන්න, රෝද පුටුවක් ගන්න, ට්‍රොලියකින් ගෙනියන්න, පිරිසිදු කිරීමක් කරගන්න පගාවක් දෙන්නම ඕනේ.

අතමිට මොලවන්නම ඕනේ.

පසුගිය වසර 5 තුළ මා හෘද සැත්කමටත්, මගේ පියා අවසන් කාලයේත් දින කිහිපය බැගින් කොළඹ මහ රෝහලේ නේවාසිකව ඉද්දී මේ අත්දැකිම් ලැබුවා. මා ඒ මාෆියාවට ගොදුරු වුණා. වැටුප් ලබන ඔවුන් හිතන්නේම තමන්ට අතයට මුදලක් ගෙවිය යුතුම බවයි. අප ඊට අනුගත වන්නේ රෝගියා ගැන හිතලයි.

වෛද්‍යවරුන්, හෙදියන් ලබන දීමනා හෝ පහසුකම් මේ කාණ්ඩවල අය ඉල්ලීම විහිළුවක්. මේ සටන් කණ්ඩායමේ සංයුතියත් කිසිම ගැලපීමක් නෑ. මට පේන්නේ වෘත්තීය සමිති නායකයින්ට සටන් උපක්‍රම තේරෙන්නෙත් නෑ.

ඔව් ඉතිං...මතකනෙ. සමන්ප්‍රිය කියන අප්‍රිය නායකයෙක් සියල්ල පාවා දීලා දවස් කිහිපයකට මංත්‍රී වෙලා කාර් පර්මිට් එකක් අරං වෘත්තීය සටන් නිමා කොට පෞද්ගලික අවශ්‍යතා ඉෂ්ඨ කරගත් හැටි.

බෙල්ලන වෛද්‍යවරයා කියන විදිහ සාහසික වගේ පෙනුණත් ඒ ඇත්ත. රෝහල්වල කම්කරු හා ඇටෙන්ඩන්ඩ් සේවා පෞද්ගලීකරණය කළොත් මීට වඩා සේවයක් සැලසේවි.

-සිතන්නා...

බෑ කියලා බෑ එළුවෝ..CO ගෙ ඕඩර් ස්

නාවික හමුදාවේ මා ගත කළ වසර 5 ක කාලයේදී මා ලද වෙනස් ආකාරයන්ගේ අත්දැකීම් කතා කෝච්චියෙන් විටින් විට ගෙන එනවා.

තවත් එවන් අත්දැකීම් කීපයක මතක..

හරියට පීනන්නත් බැරිව ගැඹුරු මුහුදේ යටට ඇදී ගිය දවසක්..

මහ රෑ ගැඹුරු මුහුදේ හොරබඩු වල්ලමක් පස්සේ...

ඩෙල්ෆ්ට් දූපතේ එළුවන් මංකොල්ලය...

බෑ කියලා බෑ එළුවෝ..CO ගෙ ඕඩර් ස්

-සිතන්නා...

අතුරුදන් වූ සුමිතුරා...

 ඩී.ඩී. විජේසිංහ විශ්වවිද්‍යාලයේදී හඳුනාගන්න ලැබුණු මගේ සුමිතුරෙක්.

නිරන්තරව සිනහවෙන් මුව සරසා ගත් විජේ ගේ අතුරුදන් වීම හද කම්පා කරන්නක්. ලෙල්ලොපිටියේ උපත ලද විජේ පේරාදෙනියේ අක්බාර්-නෙල් ශාලාවේ නේවාසිකව ඉද්දී කයිය ගැහුවේ "ජෝ අබේවික්‍රම ඉපදුණ ලෙල්ලොපිටිය නම් වූ සුන්දර ගම්මානයෙන් ආපු කොල්ලෙක් හරිද..." කියායි.

ඒ සුන්දර "කොල්ලා" යළි දැකගන්න ලැබේවායි පතනවා හැර කුමක් කරන්නද?

================================

මේ පුවත්පත් වාර්තාවක්...

සිවිල් ඉංජිනේරුවා අතුරුදන්ව දවස් 22ක් – කිසිම තොරතුරක් තවමත් නෑ

විමර්ශන කටයුතු අපරාධ පරීක්ෂණ දෙපාර්තමේන්තුවට

– ඉංජිනේරුවාගේ කැබ් රිය උඩුවර මංසන්ධිය අසල තිබී හමු වෙලා

– කැබ් රිය නාර්තුපාන පාලම ආසන්නයේ නවතනු දුටු පුද්ගලයකුගෙන් ප්‍රකාශයක්

– බළන්ගොඩ ජල විදුලි බලාගාරයක් හවුලේ කරගෙන යන දෙදෙනකු ඇතුළු 16කගෙන් ප්‍රශ්න කරයි

බළන්ගොඩ සිට බොරලැස්ගමුවේ නිවෙස වෙත කැබ් රියෙන් පැමිණෙමින් සිටියදී අතුරුදන් වූ සිවිල් ඉංජිනේරුවරයා සම්බන්ධයෙන් විමර්ශන සිදු කිරීම අපරාධ පරීක්ෂණ දෙපාර්තමේන්තුව වෙත ද යොමු කළ බව පොලිස් මූලස්ථානයේ ජ්‍යෙෂ්ඨ පොලිස් නිලධාරියෙක් පැවසීය.

බොරලැස්ගමුව අභයරත්න මාවත පදිංචිව සිටි දූල්වල දේවගේ විජේසිංහ (66) නම් දෙදරු පියා අතුරුදන් වී අදට දින 22කි. වැඩ බලන පොලිස්පති දේශබන්දු තෙන්නකෝන් මහතාගේ නියමයෙන් එම විමර්ශන කටයුතු යොමු කර ඇති අතර, මේතාක් පාණදුර කොට්ඨාස අපරාධ විමර්ශන අංශය මඟින් සිදු කළ විමර්ශනවල උදෘත පිටපත් අපරාධ පරීක්ෂණ දෙපාර්තමේන්තුව වෙත යොමු කර ඇත.

සිවිල් ඉංජිනේරුවරයාගේ අතුරුදන් වීම සම්බන්ධයෙන් මේ වන විට ඔහු සමඟ බළන්ගොඩ ප්‍රදේශයේ ජල විදුලි බලාගාරයක් හවුලේ පවත්වාගෙන යන පුද්ගලයන් දෙදෙනකු ඇතුළු පුද්ගලයන් 16 දෙනකුගෙන් පමණ ප්‍රකාශ සටහන් කර ගැනීමට පාණදුර කොට්ඨාස අපරාධ විමර්ශන ඒකකයේ නිලධාරීන් විසින් පියවර ගෙන තිබිණි.

ප්‍රකාශ සටහන් කර ගත් පුද්ගලයන් අතර දෙසැම්බර් 28 වැනි දින රාත්‍රියේදී කැබ් රිය නාර්තුපාන පාලම ආසන්නයේ නවතනු දුටු පුද්ගලයකුද වන බව පොලිසිය කියයි. එහෙත් ඔහු කැබ් රිය පදවාගෙන පැමිණියේ කවුරුන්දැයි නොදැක්ක බව පොලිසියට දුන් ප්‍රකාශයේ සඳහන් වේ.

තමා 28 දින රාත්‍රියේ මත්පැන් බෝතලයක් ගෙන ඒමට යතුරුපැදියෙන් යමින් සිටියදී නාර්තුපාන පාලම ආසන්නයට පැමිණි කැබ්රථයක් නැවැත්වූ බවත්, තමා එය පොලිස් ජීප් රියක් යැයි සිතා ඒ දෙස ඕනෑකමින් බැලූවත් එහි ඇතුළත සිටින පුද්ගලයන් නොදැක්ක බවත් යළි එන අතර වාරයේද කැබ් රිය එම ස්ථානයේ නවතා තිබූ බවත් තමන්ට අමුත්තක් දකින්නට නොතිබූ බවත් ඔහු කළ ප්‍රකාශයක සඳහන් වන බව පොලිස් ආරංචි මාර්ග සඳහන් කරයි.

අතුරුදන් වූ ඉංජිනේරුවරයාට අයත් කැබ් රිය හොරණ මතුගම මාර්ගයේ නාර්තුපාන පාලමට ආසන්නව උඩුවර මංසන්ධිය අසල තිබියදී ඉකුත් මස 29 දින අලුයම 1.30ට පමණ රාත්‍රි ජංගම මුර සංචාරයේ නිරත අඟුරුවාතොට පොලිසියේ නිලධාරීන්ට හමු වී තිබිණි.

අතුරුදන්ව සිටින සිවිල් ඉංජිනේරුවරයා කැබ් රියේ ඉදිරිපස දොරවල් දෙකම විවෘතව තිබී ඇති අතර, පොලිස් නිලධාරීන් විදුලි පන්දම දල්වා ඒ තුළ නිරීක්ෂණය කිරීමේදී ලැප්ටොප් පරිගණකයක්, ඇඳුම් පැලඳුම් අඩංගු ගමන් බෑගයක්, සෙරෙප්පු යුගළක්, කැප් තොප්පියක් හා රියැදුරු අසුනට යාබද අසුන මත මුදල් පසුම්බියක් තිබී ඇත. මුදල් පසුම්බියේ තිබූ දුරකතන අංකයකට පොලිස් නිලධාරීන් ඇමතුමක් දීමෙන් අනතුරුව බොරලැස්ගමුව අබේරත්න මාවතේ ඉංජිනේරුවරයාගේ බිරිය ඊට ප්‍රතිචාර දක්වා ඇති අතර, සිය සැමියාට ඊට පෙර දින රාත්‍රී 8.30ට පමණ දුරකතන ඇමතුමක් දීමේදී ඔහු කැස්බෑව ප්‍රදේශයේ තවම පැමිණෙන බව ප්‍රකාශ කළ බව ඇය පොලිසියට ප්‍රකාශ දී තිබිණි.

එහෙත් විමර්ශන සිදු කරන පොලිස් නිලධාරීන් සිවිල් ඉංජිනේරුවරයාගේ දුරකතන අංකය මඟින් කළ පරීක්ෂාවේදී ඔහු අවසන් වරට නිවෙසට ඇමතුම් ගෙන ඇත්තේ ඉංගිරිය ඌරුගල ප්‍රදේශයේදී බවට අනාවරණය වී ඇත. ඔහු කිසියම් පුද්ගලයකුගේ හෝ පිරිසකගේ බලපෑමකට යටත්ව තමා සිටින්නේ කැස්බෑවේ බවට බොරුවක් බිරියට පැවසූවා දැයි විමර්ශන නිලධාරීන්ගේ අවධානය යොමු වී ඇත.

අතුරුදන්ව සිටින සිවිල් ඉංජිනේරුවරයා බළන්ගොඩ ප්‍රදේශයේ පවත්වාගෙන යන ජල විදුලි බලාගාරයේ වැඩකටයුතු සොයා බැලීමට ඉකුත් 25 දින බොරලැස්ගමුව අබේරත්න මාවත නිවෙසින් පිටත් වී ගොස් තිබිණි.

ඔහු ඉකුත් 28 දින බළන්ගොඩින් සිය නිවෙස බලා ඒමට පිටත් වී සවස 4.41ට පමණ බළන්ගොඩ නගරයට පැමිණ පෞද්ගලික බැංකුවක ඒටීඑම් කුටියකින් රුපියල් ලක්ෂ දෙකක මුදලක් ගෙන විදුලි බලාගාරයේ කළමනාකරුවකුට එයින් එක්ලක්ෂ අනූදහසක මුදලක් දී තිබෙන බවට එම කළමනාකරුගේ ප්‍රකාශයකින් අනාවරණය වූ බව පොලිසිය කියයි.

අනතුරුව බළන්ගොඩ සිට කිරිඇල්ල දක්වා පැමිණෙන අයුරු සීසීටිවී කැමරා දර්ශනවල සටහන්ව ඇති අතර, ඉංගිරියට ආසන්න ඌරුගල සිට ඉංගිරියට විනාඩි දෙක තුනක් වැනි කාලයකදී පැමිණිය හැකි මුත් ඌරුගල දෙසින් ඈගල් ඔය පාරේ ධාවනය කර ඇතැයි පොලිස් විමර්ශනවලදී අනාවරණය වී ඇත.

අනතුරුව විනාඩි 45ක් වැනි දීර්ඝ වේලාවකට පසු ඉංගිරිය නගරය පසු කර රෝහල ආසන්නයෙන් මතු වී හොරණ හරහා යාල හන්දියෙන් නාර්තුපාන දෙසට තමන් ගන්නා අයුරු සීසීටීවී කැමරාවල සටහන්ව ඇතැයි පොලිස් නිලධාරියෙක් පැවසීය.

එලෙස ඉංගිරිය නගරය මඟහැර මෝටර් රථය ධාවනය කර තිබුණේ ඉංගිරිය නගරය ආසන්නයේ යොදා තිබෙන පොලිස් මාර්ග බාධකය මඟහැර යෑමට දැයි විමර්ශන නිලධාරීන්ගේ අවධානය යොමු වී තිබේ.

අතුරුදන්ව සිටින සිවිල් ඉංජිනේරුවරයාගේ නිවෙසට පැමිණෙන මාර්ගයට ප්‍රතිවිරුද්ධ මාර්ගයක මෝටර් රථය ගමන් කර, රාත්‍රී 9.30ට පමණ එහි ඉදිරිපස විදුලි ලාම්පු නිවාදමන අයුරු සීසීටීවී කැමරාවක සටහන් වී ඇතැයි පොලිස් නිලධාරියා වැඩිදුරටත් පැවසීය.

මේ වන විට ජංගම දුරකතන කීපයක විශ්ලේෂණ වාර්තා අදාළ සමාගම් කීපයකින් ගෙන විමර්ශන කරන අතර, තවත් දුරකතන අංක කිහිපයක විශ්විලේෂණ වාර්තා ගැනීමට අදාළ දුරකතන සමාගම් වෙත යොමු කර ඇතැයිද පොලිස් නිලධාරියා පැවසීය.

මේ දක්වා පැතිකඩක් කිහිපයක් ඔස්සේ විමර්ශන කළද අතුරුදන්ව සිටින සිවිල් ඉංජිනේරුවරයා සම්බන්ධයෙන් කිසිදු තොරතුරක් අනාවරණය නොවීම පිළිබඳව විමර්ශන නිලධාරීන්ද පුදුමයට පත්ව ඇතැයි දැනගන්නට තිබේ.

අතුරුදන්ව සිටින සිවිල් ඉංජිනේරුවරයා හෝ පවුලේ සමීපතමයන් සම්බන්ධයෙන් සැකයට භාජනය වන කිසිදු කරුණක් හෝ ඔවුන්ට එරෙහිව යම් විරුද්ධවාදියකු හෝ කණ්ඩායමක් සිටින බවට මේ තාක් සිදු කළ විමර්ශනවලදී කිසිදු තොරතුරක් හෝ සැකයක් අනාවරණය වී නැතැයිද පොලිසිය සඳහන් කරයි.

-සිතන්නා...

දරු තිදෙනෙකුගේ මවක් වෙනුවෙනි.

මගේ විශ්වවිද්‍යාල සගයෙකු වූ වසර කිහිපයකට පෙර වියෝ වූ එන්. බී. නෙවිල් සොහොයුරාගේ බාල පුතුණුවන් එවා ඇති පණිවිඩය මෙසේ බෙදා හරිමි.

=========================

අපේ ආදරණීය අම්මා, එස්.එම්.එන්. ක්‍රිෂාන්ති සමරතුංග (අවුරුදු 53)

2015 දී Auto Immune Hepatitis රෝගයෙන් පෙළෙන බව හඳුනා ගන්නා ලදී. දැන් ඇය non-alcoholic cirrhosis රෝගී තත්ත්වයට පත්ව ඇති බැවින්, ඇයට චෙන්නායි හි රෙලා ආයතනය සහ වෛද්‍ය මධ්‍යයස්ථානයේදී අක්මා බද්ධ කිරීමක් සිදු කිරීමට අවශ්‍ය වේ. සැත්කම සඳහා ඇස්තමේන්තුගත මුදල රුපියල් මිලියන 13.5 ක් පමණ වේ.

★★★★★★★★★★★★★★★★★★★★

දැනට, ඇය 2024 මැයි මාසයේදී ශල්‍යකර්මය කිරීමට බලාපොරොත්තු වේ, මන්ද ඉන්දියාවෙන් පැමිණි සැත්කම සිදු කරන වෛද්‍ය මණ්ඩලය හැකි ඉක්මනින් සැත්කම සිදු කරන ලෙස උපදෙස් දුන් බැවිනි.

★★★★★★★★★★★★★★★★★★★★

අපේ තාත්තා, සම්ප්‍ප්‍රේෂණ මාර්ග සැලසුම් ඉංජිනේරුවෙකු (Transmission line design engineer) වූ එන්.බී.නෙවිල් පේරාදෙණිය විශ්වවිද්‍යාලයෙන් (E79 කණ්ඩායම) උපාධිය ලබා ඇත. ඔහු ලංකා ධීවර සංස්ථාවේ හිටපු සභාපතිවරයෙකුද විය. 2010 අපේ තාත්තා නැති වුණාට පස්සේ අපිව දැන් ඉන්න තැනට එක්කගෙන ගියේ අපේ අම්මා.

අපි, ඇගේ දරුවන් තිදෙනා, අපගේ මවගේ ජීවිතය බේරා ගැනීමට අවශ්‍ය මුදල සොයා ගැනීමට ඔබෙන් උපකාර පතමු.

වැඩිමහල් දරුවා: නෙත්මි නාඔටුන්න (වයස 26), කොළඹ විශ්වවිද්‍යාලයේ වෛද්‍ය පීඨයේ උපාධි අපේක්ෂිකාවකි.

දෙවන දරුවා: ආසියානු සහ ලෝක ශූරතා තරඟ කිහිපයකදී ශ්‍රී ලංකාව නියෝජනය කළ ජාතික චෙස් ක්‍රීඩකයෙකු වන දිනෙත් නාඔටුන්න (වයස අවුරුදු 24) දැනට චෙස් පුහුණුකරුවෙකු ලෙස කටයුතු කරයි.

බාලම දරුවා: දිනිල් නාඔටුන්න (වයස 23), මොරටුව විශ්වවිද්‍යාලයේ ඉලෙක්ට්‍රොනික හා විදුලි සංදේශ ඉංජිනේරු දෙපාර්තමේන්තුවේ උපාධි අපේක්ෂකයෙකි.

බොහෝම ස්තූතියි.

ගිණුම් විස්තර

8200053067

කොමර්ෂල් බැංකුව

ස්විෆ්ට් කේතය: CCEYLKLX

නුගේගොඩ ශාඛාව

S.M.N.K සමරතුංග

=========================

ඉතා සුළුවෙන් හෝ උදව් කළ හැකි අය වෙත්නම් අවධානය සඳහාය.

-සිතන්නා...

"රහස් කියන කඳු" කියන රහස

වධකයාගේ පාර්.ශවයේ සමාජ ඛේදවාචකය ‌නොහොත් “රහස් කියන කඳු” කියන රහස් ....

ජගත් මනුවර්.ණ අධ්‍යක්ෂණ කළ “රහස් කියන කඳු” සිනමා නිර්.මාණය ගැන මගේ අදහස්.

"රහස් කියන කඳු"

-සිතන්නා...