පිටකැසීමේ විචාර

 

                     

සමහර නවකතා, චිත්‍රපට මට ගන්නම දෙයක් නැති අසාර්ථක ප්‍රකාශන වෙද්දි ප්‍රවීණ කලාකරුවන් ඇතුළු ආචාර්ය මහාචාර්යවරුන් ඒවා අතිශයින් වර්ණනා කරමින් යුගයේ බිහි වූ විශිෂ්ටතම කෘති ලෙස හඳුන්වද්දී මට මගේ රසඥතාව ගැන යළි හිතා බලන්න වෙනවා.

ඒ හංදා මගේ අදහස් විමසා පොත් එවීමෙන් වළකින ලෙසත්, මට චිත්‍රපට නරඹන්නට ආරාධනා නොකරන ලෙසත් මගේ මිතුරන්ගෙන් ඉල්ලා සිටින්නට කැමතියි.

එක්කෝ මං මැට්ටෙක්. නැත්නම් අනෙක් සෙට් එක අමු තක්කඩි.

මෙහෙම කියන්න හේතු වුණු කාරණා හතරක් කියන්නම්.

1. මගේ මිත්‍රයෙක් චිත්‍රපටයක් අධ්‍යක්ෂණය කළා. එකල මෙන්ම අදත් ඔහු ඉන්නේ විදෙස්ගතවයි.

එකල මා පුවත්පතකට චිත්‍රපට විචාර ලියමින් හිටියා. මා මේ චිත්‍රපටය ගැන මට දැනෙන දේ ලිව්වා. හොඳ මෙන්ම නරකත්.

ඔහු මා එක්ක අමනාප වුණා.

ඔහුගේ හිතවතුන් චිත්‍රපටය බෙහෙවින් අගය කළා.

2. මගේ තරුණ කාලේ ඒ වන විට පොත් කිහිපයක් පළ කොට තිබූ ලේඛකයෙකුගේ අලුත් පොත ගැන ප්‍රසිද්ධ වේදිකාවේ අදහස් දක්වන්නට මට ආරාධනා ලැබුණා. මට පොත දිරෙව්වෙම නෑ. මා පොත ගැන දැඩි විවේචනයක් එල්ල කළා. 

එදා පැවැත් වූ අනෙක් දේශන වලදී පොත බෙහෙවින් අගය කළා.

ඔහු මා එක්ක අමනාප වුණේ නැහැ.

3. මෑතකදී මගේ මිතුරෙක් චිත්‍රපටයක් නිර්මාණය කළා. චිත්‍රපටයේ විශේෂ දර්ශනයක් නැරඹීමට මට ආරාධනා කළා.   එය සිනමාත්මක වැඩක්. ඒත් අඩුපාඩු කිහිපයක් මා දැක්කා. ඒ්වා සකස් කරගන්නේ නම් චිත්‍රපටය වඩාත් හොඳ මට්ටමකට ගෙන එන්නට හැකිය කියන අදහසින් තමයි  ෆේස්බුක් හි ඉතා කෙටි අදහසක් ලිව්වේ.

ඔහුගේ හිත රිදී තිබුණ නිසා මගේ අදහස ඉවත් කළා.

 මේ ගැන වෙනත් අයගේ වර්ණනාත්මක ස්වරූපයේ අදහස් පළ වී තිබුණා. 

ඔවුන් මා දුටු අඩුපාඩු දැක්කාද, නොදැක්කා සේ සිටියාද කියා දන්නේ නැහැ. හැබැයි චිත්‍රපටය නරඹා පහළට එද්දී වෙනත් විචාරකයෙකු මගේ එක් අදහසකට එකඟ බව කිව්වා. ඒත් ඔහු ඒ බව ප්‍රසිද්ධියේ කියන එකක් නැහැ.

4. කිසිදා මට හමු වී නැති නවක ලේඛකයෙකු තමන් ලියූ නවකතාවක(?) පිටපතක් මට එවා අදහස් විමසුවා. මගේ අදහස් දැනගන්නට අවශ්‍ය බව නැවත නැවත සිහිපත් කළා. ඒ පොත මගේ පොත් අතර සැඟවී තිබී අමාරුවෙන් සොයා ගත්තා.

එම පොත නවකතාවක් නොවන බවත්, හුදු ජීවන තොරතුරු වාර්තා කිරීමක් බවත් මා පෞද්ගලිකව ලියා යැව්වා.

ඔහු ඉන් සතුටට පත් වූයේ නැහැ.

මා එලෙස සිතන්නේ පොත ගැන වර්ණනා කරමින් ප්‍රවීණයින් ලියූ ප්‍රසශ්ති මට කියවන්නට එවූ නිසයි. එසේම මේ පොත කිසියම් තරඟයකින් ප්‍රථම ස්ථානය ලැබූවක් බවද වැඩිදුරටත් සඳහන් කොට තිබුණා.

හිතවතුන්ගේ පිටකසන විචාර නිර්මාණකරුවා ගෙඩි පිටින් ගත්තොත් ඒ ඔහුගේ විනාශයේ ආරම්භයයි. ඒ වගේම නාඳුනන කෙනෙකුගේ පොතක් ගැන අදහස් පළ කරන්නැයි ඉල්ලා සිටි විට පොත උඩින් පල්ලෙන් පෙරළා ඔසවා තබන ප්‍රවීණයින් කරන්නේ හානියක්.

-සිතන්නා...